”E fantasija si jekh lašho than, ke khote naj graniza”

O Bagir Kwiek phenel peski historija, pa leski zor aj sostar si vazno te avel fokus pe le minoritetori rom. Akana vo site lel pe te kerel bučhi kaj Kungliga Biblioteket. Ke vo da gata peski buci sar läsambassadör kaj Kulturrådet.

Kon si o Bagir Kwiek?

– Me sim rom anda Švedo aj me sim jekh aktivisto. Mande si jek pačhaimos, ke svako manuš biril te parudol, vi te si defjal phares. Me sim vi jekh manuš kaj biriv te dikhav kana naj variso vorta aj biriv te alonav te vazdav vi opre muro hango te trobula.

Sar si tuke vazno litteratura aj te gines kniški?

– Muro ilo phabol te ginav kniški. Kana kerde presentacija pe mande po Bokmässan ando Göteborg sar kniškako ramatori, godo sas mange jekh momneto kaj šoha či gindisajlem ke saste arisav te dikhav. Sostar me simas akhardo pe godya mässa sas ke me aj Monica Hirsch ramosardam jek paramicengi kniska Det var en gång det som inte var.

–  Me mangav te vazdav opre sa le manusen te na geton peske sune, šoha te na mukhen pesko pačhajimos ke svako biril te kerel godo kaj si defjal phares. E fantasija si jekh lašho than, ke khote naj graniza.

Sar ačardol kaj sanas läsambassadör aj sas fokus pe minoritetori rom?

–  Me avav khatar jekh gor ando Göteborg kaj busol Bergsjön aj te kerdjol o manušh Svedosko läsambassadör – Godya si bari buci. Či arakhav vorbi sar te phenav tumenge. – Defjal vazno si te vazdas opre le romen ando Švedo, ke vorta gaday grupa sas avral o khetanimos de lungo vramja. Kana dikhel o manušh pe historjia le romengi ando Švedo atunči dikhas jekh tunariko aj xori historija, numa musaj si te prinzaras la.

Akana site les tut te keres bučhi kaj Kungliga Biblioteket -so si te kheres kothe?

– Kamav te azutinav aj te anzaras opre jekh lašho aj zoralo profundo karing e litteratura pa romengi sama ande biblioteka.  O Kungliga Biblioteket trobul te avel jekh lašho than pe e romani litteratura aj te vazdel opre romané ramatori.

Sar si tut gindo te keres e bučhi?

– Me lav mansa o romanipe, ke e familja aj mure manušh si maj vazno. Me mangav te pušhav khatar le rom so si lengi intresatno – ke ame keras gado ande jekh than! Me kamav vi te avav jekh podo maškar le rom aj o khetanimos. Sar phendem ke trobul zoralo profundo te šaj thas sa ande jekh than e romani litteratura po Kungliga Biblioteket.

– Vazno si te aresav pe thana kaj si le ternimata. Me vi pačav ke hangoske kniški si lačhe – e vorba kaj phenes anda muj trobul te arisel butende, inke maj but kaj jekh narodo kaj či phirde but ande škola aj fajma či birin te ginen.